Fréttir

Í maí er gestavakt á gamla bænum í Glaumbæ og Áshúsi milli 10 og 16 alla daga til 19. maí. Frá 20. maí til 20. september verður opið alla daga milli 9 og 18. Áskaffi er opið á sama tíma, nema 1.-19. maí en þá er kaffistofan opin 11-16. Sýningar og upplýsingaver í Minjahúsinu verða opin 12-19 alla daga frá 1. júní til 31. ágúst.

Búningar þeir sem hafa verið, og verða, til sýnis í Áshúsinu hafa verið klæddir á nýjar gínur sem fara vel með búningana.

Minjastofnun Íslands hefur úthlutað þremur styrkjum til Byggðasafns Skagfirðinga, samtals 5 millj. kr. úr Fornminjasjóði og Safnaráð hefur úthlutað safninu 3 millj. kr. í styrki úr Safnasjóði.

Húsafriðunarsjóður leggur 700 þús. kr. til Tyrfingsstaðaverkefnisins á árinu 2015.

Byggðasafnið, ásamt bandarískum samstarfsaðilum, hefur fengið veglegan styrk til þriggja ára fornleifa- og jarðasjárrannsókna úr National Science Foundation/NSF. Styrkurinn er $688.000 eða um 90 milljónir króna. Rannsóknina köllum við Skagfirsku kirkju- og byggðasögurannsóknina eða Skagafjörður Church and Settlement Survey. Rannsóknin er þverfaglegt samstarfsverkefni og um leið sjálfstætt framhald rannsókna Byggðasafnsins á fornum kirkjugörðum í Skagafirði og rannsóknum bandaríska teymisins á byggðaþróun á Langholt, sem staðið hafa yfir í nokkur ár. Henni verður nú beint að Hegranesi.

Undanfarin þrjú ár hefur Bryndís Zoëga, landfræðingur, skráð strandminjar út að austan. Skráningunni var skipt í þrjá áfanga og hinum þriðja og síðasta er nú lokið.

Ársskýrsla fyrir árið 2014 er komin út og hægt er að lesa hana á Gagnabankanum hér á heimasíðunni.

Ársskýrsla Fornverkaskóla er komin á heimasíðu Fornverkaskólans

Þrettán manns störfuðu við safnið á árinu 2014 og á þriðja tug einstaklinga til viðbótar tóku þátt í verkefnum á vegum þess eða tengdum því. Verkefni ársins voru margvísleg og gestir safnsins hafa aldrei verið fleiri. Snemma árs hlut safnið viðurkenningu ráðherra menningarmála samkvæmt tillögu Safnaráðs en viðurkenningin er forsenda þess að hægt sé að sækja um rekstrar- og verkefnastyrki til Safnasjóðs. Helstu verkefni ársins eru rakin á næstu síðu.

Samhliða skráningum í Sarp sem er miðlægur gagnagrunnur minjasafna landsins, og fleiri stofnana, þarf að ljósmynda alla safnmuni þannig að hægt sé að sjá munina um leið og flett er upp í gagnasafninu. Á næstu mánuðum og árum verða allir safnmunir ljósmyndaðir, hvort sem þeir eru í geymslum eða sýningum. Þótt ljósmynd sé ekki komin við hvern grip í Sarpi eins og er má finna þar nákvæmar munalýsingar um þá ef leitað á heimasíðu gagnabankans, sem er www.sarpur.is, og ef hakað er í leit án ljósmynda. Um leið og mynd er sett inn birtast safnmunir tafarlaust.