Fréttir

Eins og á jólaföstum undanfarin 18 ár bjóða starfsmenn safnsins gestum að ganga með sér í rökkrinu í gamla bæinn í Glaumbæ og njóta kyrrðar og tíðaranda löngu liðinna jóla.

Safnaráð hefur staðfest nýja stofnskrá Byggðasafns Skagfirðinga og tekur hún gildi þann 1. desember n.k. Stofnskrá þessi er hin 4. sem samin er fyrir safnið frá stofnun þess. Endurnýja þurfti stofnskrána í samræmi við ný safnalög sem tóku gildi þann 1. jan. 2013.

Á sunnudaginn kemur, þann 24. nóv. er komið að næstsíðasta lestri Sturlungaslóðarhópsins, sem hefur verið í Áskaffi síðstu þrjá sunnudaga. Lesin verður Sturlusaga. Lestur þessa sunnudags hefst á 12. kafla. Síðasti lestur Sturlusögu verður sunnudagur 1. desember og þá ljúkum við sögunni. Allir velkomnir.

Áshúsið verður opið almenningi alla sunnudaga fram að jólum frá 12 til 17 og hægt er að fá að skoða gamla bæinn í Glaumbæ á sama tíma. Áskaffi er opið á sama tíma.

Næsta sunnudag, þann 13. október verða sýningarnar í Minjahúsinu, gamla bænum í Glaumbæ og í Áshúsinu opnar frá 13 til 17 og það kostar ekkert inn. Áskaffi opnar kl. 12 þennan daginn og í matinn er sunnudagssteik að hætti ömmu og mömmu. Laugardaginn 12. okt. verða flest söfn og setur í Húnavatnssýslum með sýningar sínar opnar frá 13 til 17. Aðgangur ókeypis.

Í síðustu viku grófu Rarik-menn skurð austan við gamla bæjarhólinn í Keflavík í Hegranesi. Í skurðinum sá Þórey bóndi í Keflavík hleðslusteina sem hún lét vita af. Þegar þeir voru kannaðir í morgun komu í ljós gamlar hleðslur undir ljósu öskulagi frá Heklugosi 1104. Sömuleiðis fundust fótabein tveggja einstaklinga sem hafa verið lagðir þar til greftrunar.

Dagana 18-20. október er fyrirhugað að halda námskeið í kljásteinavefnað í Auðunarstofu, á Hólum í Hjaltadal. Upplýsingar gefur Bryndís Zoëga, bryndisz@skagafjordur.is eða í síma 453 5097.

Í dag fékk fyrsti hópur nemenda í húsasmíðum í FNV að kynnast hvernig best er að haga timburviðgerðum á gömlum húsum. Framhúsið á Tyrfingsstöðum er kjörinn vettvangur fyrir slíka kennslu. Kennari þeirra er Björn Björnsson, trésmíðameistari. Byggðasafnið, Fornverkaskólinn ogTyrfingsstaðabændur útvega farartæki, fæði, efni og aðstöðu.

Fornleifadeild Byggðasafns Skagfirðinga, ásamt samstarfsaðilum, hlaut nýverið Evrópustyrk til greininga á íslenskum deiglum. Deiglur eru ílát til að bræða málma, einkum eir eða kopar og ýmsar samsetningar af kopar, tini og blýi og hafa verið notaðar á Íslandi frá landnámi til okkar daga. Í elstu tíð hafa þær verið smáar, á stærð við kaffibolla og jafnvel smærri, og gerðar úr leir, en á seinni öldum einnig úr málmum og steinefnum af ýmsu tagi.

Nú er lokið uppgreftri 11. aldar kirkjugarðsins að Stóru-Seylu, Langholti. Frumniðurstöður rannsóknarinnar benda til að garðurinn hafi verið fremur stutt í notkun þar sem í honum fundust einungis 23 grafir. Þar af voru áætlaðar grafir 13 fullorðinna einstaklinga, tvær grafir stálpaðra barna, gröf unglings auk 7 ungbarnagrafa. Ekki er hægt að fullyrða um aldur og kyn allra sem í gröfunum lágu þar sem að 13 þeirra höfðu verið tæmdar að fullu eða að mestu. Þó var hægt að áætla aldurinn gróflega út frá þeim beinaleifum sem enn voru til staðar í graffyllingum sem og stærð grafanna.